Nafarroako euskarazko hedabideek eta Topaguneak, Euskara Elkarteen Federazioak, salatu dute beste behin ere Euskarabideak murrizketak ezarri dituztela. Irailaren 7an Nafarroako Gobernuak jakinarazi zuen aurtengo aurrekontuetan 327,25 milioi euroko gastu murrizketa egingo zuela. “Doikuntza” horien helburua aurrekontuaren egonkortasuna bermatzea dela azaldu zuten.
Azaroan, Maximino Gomez Serrano Euskarabideako zuzendari kudeatzaileak azaldu duenez, “Nafarroako Gobernuak aurrekontuak doitzeko hartutako erabakiak euskararen gaineko programak komunikabideetan” kontu-sailari ere eragin dio. Euskarabideak jakinarazi duenez urriaren 31ra arte justifikatutako gastuak ordaintzeko adina diru badu, baina urteko azken bi hilabeteetarako aurreikusia zuen dirurik ez dago.

Hedabideen egoera ekonomikoa

Murrizketa horiek guztiek, “euskarazko hedabideok aurretik jasaten ari garen egoera ekonomiko larria areagotzen du”, gaineratu dute Nafarroako hedabideek ordezkariek. “Orain, bat-batean, zati bat kentzea lehendik ahula den gure ekonomia-osasuna kolokan uzten du”, jarraitu dute bozeramaileek.
Horregatik, esleitutako diru-laguntza bere osotasunean ematea exijitzen dute. Aldi berean, sektoreko aktoreekin bildu, egoera aztertu eta etorkizunerako hitzarmen bat lantzea eskatzen dute, Nafarroako Parlamentuak 2009an eskatu zuen moduan.

Erabileraren GPS-a urteak daramatzate Soziolinguistika Klusterrak, Urtxintxa Eskolak eta Topaguneaeuskara elkarteen federazioak elkarlanean gazteen hizkuntza erabileraren gaia jorratzen. Hainbat aditu, aritu eta gazterekin “Gazteen hizkuntza erabileran eragiten duten faktoreen azterketa” aurrera eraman zen. Azterketa hura egin zenetik, hartzaile mota ezberdinen artean aurkeztu da eta bide askotatik zabaldu da.

ZER da?
Gazteen hizkuntza erabileran kokatu eta bertan esku hartzeko gida, liburuxka eta poster formatuan.

ZERGATIK sortu da?
Hizkuntza erabileraren fenomenoaren konplexutasuna kontuan hartuta lan egitea komeni delako.

NORENTZAT eskaintzen da?
Gazteentzat eta gazteekin harremanean dihardutenentzat. Euskararen sustapenarekin lotura izan edo ez, gazteen hizkuntza erabilera kontuan hartuz lan egin nahi duen ororentzat.

NOLA egin da?
Gazteen parte hartze zuzena izan du. Era berean, esparru anitzetan lan egiten duten adituen ekarpenak ere jaso ditu, hala nola, unibertsitatekoak, hezkuntza mundukoak, administrazio publikokoak, komunikazio arlokoak, aisialdi antolatukoak, hedabideetakoak, euskararen aldeko mugimendukoak…

Paperezko liburuxka eta posterra jaso nahi izanez gero, eskaerak kluster@soziolinguistika.org helbide elektronikora bideratu behar dira. Salneurri orokorra bost eurokoa da eta Soziolinguistika Klusterreko bazkideentzat lau eurokoa.

Topagunea Euskara Elkarteen Federazioak batBIRAlau, euskal kulturaren Nafarroako zirkuituaren laugarren edizioa antolatu du. Zirkuitua maiatzaren 21ean hasi eta ekainaren 12an amaituko da, eta formatu zein kalitate handiko lau ikuskizun eramango ditu Leitza, Etxarri Aranatz, Bera eta Agoitzera.

Federazioaren zein bere kide diren Euskara Elkarteen helburu nagusia euskararen erabilera sustatzea da. Horretarako, besteak beste, kulturgintza lantzen dute, kultur sormena eta haren kontsumo aktibo eta gozagarria bultzatuz.

Horien haritik, Nafarroan kalitate handiko euskarazko kultur programazio koordinatua egiteko proposamena da batBIRAlau, aurten laugarrenez gauzatzen dena. Helburu nagusia Nafarroako herri eta eskualdeetako kultur dinamika indartzea eta aberastea du, ikusleen bizi kalitatea hobetuz. Horretarako, aurreko hiru edizioen bideari jarraiki, kalitate goreneko lau kultur ikuskizunek osatutako ibilbide koordinatu eta erakargarria eskainiko du Nafarroako hainbat zonaldetan. Eskualde bakoitzeko errealitate soziolinguistikoa kontuan hartu eta hainbat ikus entzule mota zein adin talderi zuzendutako kultur eskaintza askotarikoa eta erakargarria antolatu du Topaguneak.

Horrelako proiektu bat aurrera eramateko antolakuntza sendoa bermatzea behar-beharrezkotzat jotzen dute antolatzaileek. Horretarako, ezinbestekoa ez ezik, egitasmoaren helburu nagusienetakoa ere bada, erakunde publiko zein pribatuekin eta gizarte mugimenduarekin elkarlanean aritzea.

Otsailean abiatu zuten kanpainari segida emanez, euskarazko hedabide ez publikoen ordezkariek agerraldia egin dute Donostian, otsailaren 15ean abiatu zuten alderdi eta instituzioekiko bilera errondaren balorazioa egin eta aurrera begirako pausuen berri emateko.

Inazio Arregi (GOIENA), Jasone Mendizabal (TOPAGUNEA), Joanmari Larrarte (BERRIA) eta Xabier Letona (ARGIA) azaldu dira hedabideen aurrean. Otsailaren 15etik hona alderdi politikoekin, Eusko Jaurlaritzarekin, Nafarroako Gobernuarekin eta EAEko hiru Foru Aldundiekin. Iparraldeko erakundeekin ere badira harremanak, baina horiek une hauetan garatzen ari dira. Hedabideen ordezkariek azaldu dutenez, harrera ona izan dute joan diren guztietan, eta hiru gai mahaigaineratu dituzte: sektorearen egoera erakunde publikoekin elkarlanean aztertzeko beharra, diru-laguntzak %25 handitzeko eskaria eta publizitate instituzionalaren %25 ere euskarazko hedabide ez publikoetara bideratzeko beharra.

Arregi, Mendizabal, Larrarte eta Letona Donostiako
Koldo Mitxelena Kulturunean

Egitasmoaren helburu nagusia irakurzaletasuna bultzatzea da, euskaraz irakurtzearen alde atsegina azpimarratu nahi izan dute: euskararen erabilera gozagarria sustatu nahi du Topaguneak, irakurtzeak eta oparitzeak dakarten gozamenaren bidez.

Baina, bide batez, oso garrantzitsuak diren bestelako helburuak ere lortu nahi ditu Topaguneak ekimen honen bidez.

Alde batetik, Euskara Elkarteetako bazkide diren euskaltzaleak liburutegi publikoen erabiltzaile aktibo bihurtzea; bestetik, era askotako eragile publiko eta pribatuen elkarlana sustatzea; eta azkenik, ekimen honek ekarpena egin nahi dio euskarazko liburugintzari.

Liburuaren Egunean

‘Irakurri, Gozatu eta Oparitu’ egitasmoa apirilaren 23an hasi zen, Liburuaren Nazioarteko Egunean. Amaiera, berriz, uztailaren 23an izango du: izan ere, uda izaten da jendeak irakurtzeko denbora gehien duen tartea, eta ondorioz uda aurreko hilak oso egokiak iruditu zaizkigu liburu trukea sustatzeko.

Esan bezala, 12 herritan egongo da martxan kanpaina hau datozen hiru hilabeteotan, tokian tokiko Euskara Elkarteek sustatuta: Aramaion, Deban, Lazkaon, Ermuan, Basaurin, Santurtzin, Irurtzun eta Lizarran, besteak beste.