Zein da gehien errepikatu duzun tatuajea? Zein da bezeroek gehien eskatzen duten gaia?

Gehien eskatzen diren gaiak terrorearekin erlazionatutakoak dira. Baina garezurrak eta animaliak ere asko errepikatzen dira.

Zein gorputz ataletan tatuatzen dute marrazkia bezero gehienek?

Ohikoena sorbaldan, omoplatoetan eta orkatiletan egitea da. Azkenaldi honetan, izterrondoan ere egiten dira.

Oro har, zein izan da orain arte egin duzun tatuajerik berezi edo arraroena?

Erlojuaren mekanismoa, pertsona edo animalien erretratuak (bizirik nahiz hilda), jaioberrien oinatza...

Normalean, bezeroak ideia argiarekin etortzen dira dendara edo aholkua eskatzen dute?

Sarritan ideia batekin etortzen dira, baina, gero, guk geuk garatzeko eskatzen dute; azken finean, tatuajea pertsonala eta bakarra izan ohi da. Gainera, horrela lan egitea da gehien gustatzen zaiguna.

Kolorezko tatuajeak kolorerik gabekoak baino gehiago eskatzen dira? Prezioan dagoen aldea oso handia da?

Nire kasuan, egiten ditudan lan gehienak handiak eta koloretakoak dira.
Kolorezko tatuajeak garestiagoak dira, lan gehiago ematen dute, denbora luzatu egiten da.

Askotan entzun dugu tatuaje batzuk arriskutsuak direla, esaterako, emakumeentzat bizkarrean egitea ez da komenigarria epidurala jartzerakoan arriskutsua delako; egia da hori?

Irakurri dudanaren arabera, posiblea da tatuajea izatea eta epidurala ipintzea, ez dago arriskurik. Azalean ebaketa egiten denean, ez da pigmenturik geratzen, baina, askotan, arrisku maila anestesistarekin lotuta dago.